ODOB-AXLOQ KODEKSI

Ushbu Kodeks ASMAN UNIVERSITY (keyingi o'rinlarda – Universitet) pedagog va boshqa xodimlari, talabalari, doktorantlari kasbiy odob-axloqining tamoyillari, normalari, ta'lim jarayoni va xizmatdagi xulq-atvorining asosiy qoidalari bilan bog'liq munosabatlarni tartibga soladi.

Maqsadlar: umumiy madaniyatni rivojlantirish; zamonaviy imijni shakllantirish; Universitetga hurmat ruhida tarbiyalash. Vazifalar: huquqbuzarlikni oldini olish; salbiy illatlardan himoya qilish; fuqarolarning huquqlarini hurmat qilish ko'nikmasini shakllantirish; vatanparvarlik va ma'naviy-axloqiy fazilatlarni shakllantirish.

Ushbu Kodeks Universitetning barcha xodim, talaba va doktorantlariga nisbatan tatbiq etiladi.

Mazkur Kodeks qonuniylik, fuqarolarning huquqlari va erkinliklari ustuvorligi, vatanparvarlik, xizmat va o'qish burchiga sodiqlik, adolat, halollik va xolislik, samaradorlik va tejamkorlik prinsiplariga asoslanadi.

Universitet xodim, talaba va doktorantlari O'zbekiston Respublikasi qonunchiligiga so'zsiz rioya qiladilar hamda o'z xizmat va o'qish majburiyatlarini lavozim yo'riqnomalari va ushbu Kodeks qoidalariga muvofiq bajaradilar.

Fuqarolarning huquqlari, erkinliklari va qonuniy manfaatlari Universitetning oliy qadriyati bo'lib hisoblanadi. Universitet xodim, talaba va doktorantlari fuqarolar huquqlarining buzilishiga yo'l qo'ymaydilar.

Xodim, talaba va doktorantlar o'z faoliyatlarini ma'naviy-axloqiy qadriyatlar, Vatanga sadoqat asosida amalga oshiradilar va xizmat burchlarini o'zaro xayrixohlik bilan bajaradilar.

Universitet xodim, talaba va doktorantlari o'z faoliyatlarida adolatli, halol va xolis bo'lishlari hamda barcha yuridik va jismoniy shaxslarga nisbatan ushbu prinsip talablari asosida munosabatda bo'lishlari shart.

Xodim, talaba va doktorantlar o'z faoliyati samaradorligini innovatsion texnologiyalarni tatbiq etish orqali doimiy ravishda oshirib boradilar va Universiteti mulkiga ehtiyotkorlik bilan yondashadilar.

Universitet xodim, talaba va doktorantlari korrupsiyaning har qanday shaklini qabul qilmaydilar. Ular korrupsiyaga qarshi kurashishlari, faoliyatlarini oshkora va adolatli amalga oshirishlari, yuqori axloqiy qadriyatlarga sodiq qolgan holda qonun ustuvorligiga qat'iy rioya etishlari shart.

Xodim, talaba va doktorantlar kasbiga mos zamonaviy kiyimda bo'lishlari lozim. Tanani ochiq ko'rsatadigan, haddan ziyod tor kiyimlar; sport kiyimi; pirsing va tatuirovka; ortiqcha makiyaj taqiqlanadi. Erkaklar: oq/havorang ko'ylak, klassik shim, galstuk, to'q rangdagi poyabzal. Ayollar: och rangli bluzka, tizzani yopuvchi yubka, odmi kostyum.

Tadbirlarda so'zga chiquvchilarga hurmat bilan munosabatda bo'lish shart. Raislik qiluvchining ruxsatisiz luqma tashlash va so'zga chiqish mumkin emas.

Binolarga kirishda talabalar xodimlarni, erkaklar ayollarni, yoshlar kattalarni o'zlaridan oldin o'tkazib yuborishlari lozim. Har bir shaxs ID-karta orqali turniketlardan o'tishi shart. Yo'lning o'ng tomonidan yurish va bir-biriga salomlashish tavsiya etiladi.

Xodim, talaba va doktorantlar munosabatga kirishganda: Universitet manfaatlarini ko'zlash; haqiqatga to'g'ri kelmaydigan ma'lumotlarni tarqatmaslik; shaxsiy hayot ma'lumotlarini oshkor qilmaslik; xizmat axborotini yetarlilik va ishonchlilik talablariga muvofiq taqdim etish qoidalariga amal qilishlari shart.

Xodim, talaba va doktorantlar dars mashg'ulotlari va ishga o'z vaqtida kelishlari, mehnat hamda o'qish intizomiga rioya qilishlari shart.

Qat'iyan taqiqlanadi: huquqbuzarlik yoki jinoyat sodir etish; giyohvand va alkogol moddalar iste'mol qilish; janjallashish va tinchlikka tajovuz; Universiteti mulkiga zarar yetkazish; atrof-muhitni ifloslantirish; behayo materiallarni tarqatish; universitetga tegishli kompyuterlarda noqonuniy materiallar ko'rish va saqlash.

Rahbariyat xodimlarga nisbatan yuqori professionallik va adolatda o'rnak bo'lishi, ijobiy ma'naviy-psixologik muhit shakllanishiga ko'maklashishi lozim. Rahbar kadrlarni qarindoshlik belgilari bo'yicha tanlashga, guruhbozlik va favoritizmga yo'l qo'ymasligi; manfaatlar to'qnashuvining oldini olishi; korrupsiyaga qarshi choralar ko'rishi shart.

O'zaro munosabatlar milliy qadriyat va an'analar, yagona jamoaviy muhit, o'zaro hurmat, do'stlik, hamjihatlik va adolat tamoyillariga asoslanishi lozim. Inson qadr-qimmatiga hurmatsizlik, qo'pollik va behayo so'zlar ishlatish qat'iyan man etiladi.

Pedagog xodim auditoriyaga kirganida talabalar o'rinlaridan turib kutib olishlari shart. Pedagog xodimlar talabalarga ta'limni beg'araz amalga oshirishlari, ularni kamsitmasliklar va doimo haqqoniy munosabatda bo'lishlari shart.

Talabaning pedagog xodim tomonidan biron ishga jalb etish so'roviga rad javob berishi, kelgusida talabaga past baho qo'yish yoki boshqa tazyiq bilan bog'liq munosabat ko'rsatilishiga imkon bermaydi. Bunday ta'qib (academic harassment) qattiq qoralanadi.

Dars mashg'ulotlari vaqtida uyali aloqa vositalaridan foydalanish qat'iyan taqiqlanadi. Faqat pedagog xodimning ruxsati bilangina foydalanish mumkin.

Talabalarning darsga kech qolib kelishlariga yo'l qo'yilmaydi. Uzrli sababga ko'ra kech qolgan talaba ruxsat bilan kirishi mumkin. Pedagog xodim darsni buzayotgan talabani dekaniyatni xabardor qilib chetlatishi mumkin.

Talaba pedagog xodim bilan muloqot qilmoqchi bo'lsa, maslahat soatlari yoki o'zaro kelishuv bo'yicha belgilangan vaqtda amalga oshirilishi mumkin. Asoslangan sabab mavjud bo'lsa, talabalar pedagog xodimni almashtirish haqida dekanat bilan murojaat qilishlari mumkin.

Murojaat qilish muayyan tartib (subordinatsiya tamoyili) asosida, ya'ni bosqichma-bosqich tashkil etiladi. Universitet rektoriga talabalarning to'g'ridan-to'g'ri murojaat qilish holatlari bundan mustasno.

Xodim, talaba va doktorantlarning universitetda ma'naviy-axloqiy muhitni yaxshilash, ta'lim sifatini oshirish, innovatsion g'oyalardan foydalanish bo'yicha tashabbus va g'oyalari rag'batlantiriladi.

Xodim, talaba va doktorantlar: qonun va Kodeks talablariga rioya etish; Universitet obro'sini saqlash; Universitet mulkiga ehtiyotkorlik; elektr energiyasi va suvni tejamkorona ishlatish; noxush voqealar haqida rahbariyatga xabar berish; shaxsiy va oilaviy muammolarni muhokama qilmaslik; ig'vo va bo'htonlardan saqlanish majburiyatlarini o'z zimmalariga oladilar.

Talabalar: nutq madaniyatini takomillashtirish; yozma ishlarni mustaqil bajarish; darslarni sababsiz o'tkazib yubormaslik; dars vaqtida ovqatlanmaslik va saqich chaynamaslik. Xodimlar: yoshlarni vatanparvarlik ruhida tarbiyalash; ta'lim oluvchilarni ma'naviy-axloqiy tarbiyalash; telefon orqali muloqotda madaniyatga rioya etish.

O'quv yili davomida Kodeksga to'la rioya qilgan va Universitetda yuksak ma'naviy-axloqiy muhit qaror topishiga hissa qo'shgan xodim va talabalar belgilangan tartibda moddiy yoki ma'naviy rag'batlantirilishlari mumkin.

Xodimlar tomonidan mazkur Kodeksga rioya etilishi attestatsiyalar o'tkazishda va yuqori lavozimlarga tayinlash uchun kadrlar zaxirasini shakllantirishda hisobga olinadi.

Universitet xodim, talaba va doktoranti tomonidan mazkur Kodeks qoidalarining buzilishi uni belgilangan tartibda javobgarlikka tortishga asos bo'lib xizmat qiladi.

Xodim, talaba va doktorantlar mazkur Kodeks qoidalarini buzganida, ularga nisbatan Universitet Ichki tartib qoidalarining VII bobida qayd etilgan choralar qo'llaniladi.

Kodeks normalarining buzilishiga oid masalalar Odob-axloq komissiyasi tomonidan ko'rib chiqiladi. Komissiya kamida 5 kishidan iborat tarkibda tuziladi. Universitet rektorining ko'rsatmasi bo'yicha, xizmat tekshiruvi natijalariga ko'ra yoki o'z tashabbusi bilan masalalarni ko'rib chiqishi mumkin.

Ko'rib chiqish natijalari bo'yicha intizomiy yoki boshqa tarzdagi qoida buzilishlarining mavjudligi to'g'risida xulosa chiqariladi. Komissiya zarur hollarda ogohlantirishdan tortib to intizomiy javobgarlikka tortish taklifi kiritilishi mumkin.

Xulq-atvor ustidan jamoatchilik nazoratini ta'minlash maqsadida, Kodeksga rioya etmaganlik holatlari Kasaba uyushmasi qo'mitasi, Xotin-qizlar masalalari bo'yicha maslahat kengashlari va O'zbekiston yoshlar ittifoqida ham muhokama qilinishi mumkin.

Mazkur kodeks Universitet Kengashi tomonidan tasdiqlanganidan so'ng kuchga kiradi va unga o'zgartish hamda qo'shimchalar kiritish Universitet Kengashi qaroriga binoan amalga oshiriladi.